• 12 сәуір /бейсенбі /16:00

  • 15 cәуір /жексенбі /17:00

  • 18 сәуір /сәрсенбі /19:00

  • 20 сәуір /жұма / 11:00 / 12:00

  • 29 сәуір /жексенбі /19:00

Шаблоны Joomla 3 тут

Дарабоз актер

Қарлығаш Хашымқызы, 
материал "Сарыарқа самалы" газетінің

сайтынан алынды http://www.saryarka-samaly.kz

Өнерсүйер қауым үшін Мұхтархан Манаптың есімі етене таныс. Облыстық Ж.Аймауытов атындағы қазақ музыка-драма театрының негізін қалаған актердің сахнадағы бірегей образдары бүгінгідей ел есінде. 

Мұхтархан Манап биыл 75 жасқа толып отыр. Жуықта актер мерейтойына орай Бұқар жырау атындағы әдебиет және өнер музейінде өзінің көрермендерімен және замандас әріптестерімен кездесті. Қазіргі таңда Елордадағы Жастар театрына жетекшілік жасап, қарамағындағы талантты жастарға өмір мен өнерде түйгенін үйретіп жүрген майталманның алдына қойған мақсаттары да жетерлік. - Жерлестерімнің атаулы датаны ұмытпай, құрмет көрсеткеніне ерекше қуанып отырмын. Азды-көпті осы өлкедегі қазақ театрында 25 жылдан астам уақыт еңбек еттім ғой. Жалпы, өнер жолында менің жолым болды деп айта аламын. Себебі мен ойнамаған басты рөлдер кемде-кем. Сонымен қатар сахнадағы образдарымның басым бөлігі жағымсыз кейіпкерлер болды. Бұл тұста да мен режиссер мен автордың нұсқауынан шықпай қалдым деп айта алмаймын. Әр кейіпкерімді сахна төрінде ақтап алуға тырыстым. Не себепті ол адамның сондай қатыгездікке, жамандыққа барғанын, неге жанындағы достарын сатқанын барынша ашып көрсетуге тырыстым. Бұл менің актер ретіндегі басты міндеттерімнің бірі ғана, - деді ҚР еңбек сіңірген әртісі Мұхтархан Манап. Мерейтойлық басқосу барысында М.Манаппен бір сахнада өнер көрсеткен әріптесі, Ж.Аймауытов атындағы қазақ музыка-драма театрының әртісі Рауза Тәжібаева бірге өткен күндерді еске алды. - Мұхтархан екеуіміз 20 жылдан астам уақыт бір сахнада өнер көрсеттік. Талай қойылымдарда серіктес болып, елдің ықыласына бөлене білдік. Мұхаңның облыстық қазақ театры үшін жасаған еңбегінің өзі бір төбе. Өзі басшылық етіп отырған жылдары қол астындағы әртістердің жағдайына қарап, театрдың бүгінгідей сән-салтанаты жарасып тұруына барын салды. Сондықтан біздің ұжым үшін бұл кісінің орны әрқашан төрден болмақ, - деді Р.Тәжібаева. Осы орайда Р.Тәжібаева әріптесіне театр атынан берілген Алғыс хатты табыс етті. Кездесуге орай актердің өмірі мен өнерінен сыр шертетін «Өмір өсірген өнер иесі» атты фотокөрме көрермен назарына ұсынылды.

Арманым – тарихи рөлдерді сомдау

(материал http://saryarka-samaly.kz сайтынан алынды)

 

Павлодардағы Ж.Аймауытов атындағы облыстық қазақ музыка-драма театрының ұжымын толықтырған жас әртістердің бірі – Қобыланды Болат. Ол жас болса да осы уақытқа дейін театр сахнасында талай күрделі рөлдерді сомдап, бірнеше көркем фильм мен телехикаяға түсіп үлгерді. Қазақ жұрты оны «Қазақстан» ұлттық телеарнасында көрсетілген «Көзайым», «Екі жүз» телехикаялары арқылы және «Қармен жуылған қан» атты тарихи көркемфильм арқылы жақсы біледі. Жақында әртіспен жолығып, әңгімелескен едік.

- Қобыланды, бүгінгі күнге дейін қандай да бір жетістікке жетсең, ол - ұстаздан алған білім мен тәрбиенің нәтижесі. Жалпы, қай оқу орнында қандай танымал әртістерден тәлім алдың?

- Мен - Баянауыл ауданының Егіндібұлақ ауылының тумасымын. Орта мектептен кейін, Павлодар музыкалық колледжіне түсіп, музыкалық білім беру саласы бойынша тәмамдадым. Өнер әлемінің табалдырығын осы жерде аттадым десем болады. Колледж-ден кейін Астана қаласындағы Қазақ ұлттық өнер университетіне түсіп, театр және кино актері мамандығы бойынша төрт жыл білім алдым. Мұнда қазақ өнерінің талай майталмандарын тәрбиелеген белгілі профессор Ақыш Омаровтан тәлім алдым. Ол кісі менің өнердегі және өмірдегі ең үлкен «пірім» десем, артық айтқандық болмас. Сонымен қатар, Елордадағы Қалибек Қуанышбаев атындағы академиялық театрдың белді артисі Жанқалдыбек Төленбаев ағамыздан көп нәрсе үйрендім. Өнер саласындағы қызметімді үшінші курста оқып жүрген жылы «Астана Мюзикл» театрында бастадым. Оқу бітіріп, қолға диплом алған соң, бірден өзімнің туған жерім Ертіс-Баян өңіріне тартып кеттім. Жалпы, оқуымды тәмамдағаннан кейін қызмет жолымды осындай шет өңірлерде бастап, шыңдалу – менің арманым болатын. Павлодар театрында өткен жылдың қыркүйек айынан бері қызмет етудемін.

- Облыстық Ж.Аймауытов атындағы театрда алғаш қай спектакльге қатысып, қандай рөлді сомдадың?

- Мен жұмысқа қабылданған кезде Рахат Халық есімді тағы бір жас актер Астанаға ауысты. Мен келе сала сол жігіттің рөлдерін алуыма тура келді. Сол кезде біздің театрдың сахнасында Әлімбек Оразымбетовтің «Бір түп алма ағашы» спектаклінің қойылымы жүріп жатқан еді. Маған режиссер Тұрсын есімді кейіпкердің рөлін берді. Оны маған дейін сол Рахат ойнап жүрген екен. Негізі біреудің орнына келіп, бұрын-соңды дайындалмаған рөлді алып шығу өте қиын болады екен. Себебі спектакль сахнада бірнеше рет қойылғандықтан басқа әртістер әлдеқашан дайындалған, яғни өз рөлдерін әбден сіңіріп алған. Ал төтесінен келген адам үшін оларды қуып жету оңай емес. Мұндайды театр тілімен айтқанда «вотқа түсіп қалу» дейді. Тіпті, театр әртістерінің арасында «вотқа түскенше отқа түскен артық» деген де сөз бар. Осындай жағдайға байланысты айтылған ғой. Бірақ күні-түні тынбай дайындалудың нәтижесінде өз міндетімді тез меңгеріп кеттім. Одан кейін «Адасқандар» спектаклінде адасқан жігіттің бейнесін сахналап, көрерменнің жоғары бағасын алдым. Ал қазір «Қозы Көрпеш - Баян сұлудың» премьерасына дайындалудамыз. Мен мұнда Қозыны бейнелеймін. Жалпы драмалық-психологиялық туындылар менің жаныма жақын. Алдағы уақытта да осы бағыттағы кейіпкерлер ұсынылса, қуана-қуана қабылдаймын.

- Сен «Қазақстан» ұлттық арнасында көрсетілген «Көзайым», «Екі жүз» телесериалдарына және «Қанмен жуылған қар» атты тарихи көркем фильмге түстің. Мұндай киноларға кастинг арқылы өттің бе?

- Жоғары оқу орнының үшінші курсында оқып жүріп, «МузАрт» лайф жобасына қатысып, бағымды сынап көрген едім. Дәл сол кезде «Қазақстан» ұлттық телеарнасының тапсырысы бойынша түсіріле бастаған «Көзайым» телехикаясына ұсыныс түсті. Мен де бірден келісімімді бердім. «Көзайымда» режиссерлер бас кейіпкердің жақын досы Сырым деген жігіттің рөлін тапсырды. Одан кейін «Екі жүз» деп аталатын телесериалға қатыстым. Ал Қарағанды лагері туралы «Қармен жуылған қан» атты тарихи көркем фильміне кастинг арқылы өттім. Кастингке барлығы алпысқа жуық үміткер келіпті. Арасында кәрісі де, жасы да, танымалы да, танымайтыны да бар. Режиссері – атақты «Жамбыл» көркем фильмін түсірген Ануар Райбаев. Сынақ оңай болған жоқ. Екі режиссер екі жағымда тұрып, небір тапсырмалар берді. Жылайтын кезде жылап, күлетін кезде күлдім. Қуанатын сәтте қуанып, мұңаятын сәтте мұңайдым. Күтпеген жерден кастингтен өтіп, киноның бас кейіпкері Әлихан Сейдахметов деген офицердің рөлін бейнелеу бақыты бұйырды. Жалпы, туындының мазмұны өте терең, мән мағынасы күрделі. Сондықтан сөзбен жеткізу мүмкін емес. Арнайы көрген адам ғана түсінеді. Туынды сәтті шықты деуге болады. «Қазақстан» ұлттық телеарнасының көркем фильмдер рейтингінде көш бастауы – соның айғағы. Еліміздегі үлкен қалалардағы кинопарктерде көрсетіліп, көрерменнің ықыласына ие болды. Одан кейін «Нар-Медия» продакшн компаниясы түсірген «Топыраққа тамған тер» телехикаясында баста рөлді ойнадым. Жақында «Қазақстаннан» көрсетіледі.

- «Қанмен жуылған қарда» кеңес әскерінің бейнесін көрсеттім деп отырсың. Бұл қаншалықты ауыр болды? Кастингтен өтуін өтіп алсаң да, кейін берілген образды қалай ашар екенмін деген күмән туған жоқ па?

- Жалпы, осындай күрделі туындыларға түсу менің арманым еді. Себебі бұл - жай көркем фильм ғана емес, қазақ халқының басынан өткен зобалаң жылдардың зардабын кейінгі ұрпаққа көрсететін тарихи дүние. Оның үстіне маған жағымсыз кейіпкердің емес, мейірімді әскери күзетшінің рөлі бұйырды. Оқиға желісі бойынша, мені әйелдер лагерінің күзетшісі етіп қояды ғой. Ал ол лагерьге соғыс жылдарында түрмеге түскен халық жауларының әйелдері қамалады екен. Онда қазағы бар, басқа ұлттың өкілдері бар, мыңдаған әйел жазасын өтейді. Ал мен қанша жерден әскери адам болсам да, оларға жасырын түрде қолдан келгенше көмегімді көрсетемін. Сол кезде бір орыс әйелі мені ұнатып қалады, менің де махаббатым оянады. Сонымен екеуіміздің арамызда бір сәби дүниеге келеді... Бұл жерде режиссерлер қазақ халқының қанына біткен мейірімділікті, мәрттікті және жанашырлықты көрсеткісі келді. Сондықтан мұндай тарихта қалатын туындыларға түсу әрбір актердің арманы емес пе? Ал осы кинода өнер көрсету арқылы менің бір арманым орындалды деп айтала аламын.

- Оқу бітіргенің кеше ғана, дегенмен кино және театр саласында бірқатар басты рөлдер бұйырыпты. Жалпы, сен үшін киноактер болған ұнай ма әлде театр сахнасы тарта ма?

- Негізі, әрқайсысының өзіндік ерекшелігі бар. Қойылатын талаптары да, берілетін тапсырмалары да әртүрлі. Мен театрды «әртістің спорт залы» деп санаймын. Спектакльге де, киноға да осында «шынығамыз». Мұнда дубль жоқ, үзіліс болмайды. Өзіңнің қалаған уақытыңда келіп дайындала беруіңе болады. Театрда шынайылық бар, қарапайымдылық басым. Қай әртістің нақты қандай деңгейде екенін көрсететін де - осы жер. Мысалы киноны халық телеарна арқылы көреді, ал спектакльде көрермен алдына «тірідей» шығамыз. Өзіңнің қандай деңгейде өнер көрсеткеніңді халықтың құрмет-қошеметінен бірден білуге болады. Сондықтан театр мен киноның азабы мен қуанышы мүлдем бөлек. Меніңше, театр мектебінен өтпеген адам, кинода берілген рөлді сәтті ойнауы неғайбыл. Кино арқылы танымал болған әріптес ағаларымыздың барлығы кезінде театр сахнасында өнер көрсеткен. Тіпті артистерді айтпағанда, жарық берушілер, музыка қоюшылар, киім тігушілер секілді сахна сыртында жүретін мамандар да бұл ортадан кете алмайды. Өйткені театр адам жанын өзіне баурап алады.

- Қобыланды, өнер әлемінде бағың жана берсін. Уақыт тауып, сұхбат бергеніңе рақмет!

Әңгімелескен – Тілеуберді САХАБА.

«Егемен Қазақстан» Аймауытов театры туралы     

 

   «Сіздермен қанаттас өмір сүргенім үшін бақыттымын» деп аталатын жазушы-драматург Рахымжан Отарбаевтың мерейтойына арналып, Атырауда өткен Халықаралық театр фестиваліне біздің театр да қатысқан болатын. Одан ұжым үлкен табыспен, жеңіспен оралған. Сол фестивальден есеп «Егемен Қазақстан» газетінің 23 желтоқсандағы санында шықты. Авторы Айгүл Аханбайқызы. «Ғасыр қасіреті» («Нашақор жайлы новелла» пьесасының желісімен сахналанған) спектакль фестиваль жюриінен, оның төрағасы Асаналі Әшімовтен, көрермендерден, тіпті шығарма авторының өзінен, бірауыздан жоғары бағаға ие болған. Бұл қойылымның режиссері Ержан Қаулановтың және рөлдерді сомдаған әртістер ансамблінің жеңісі!

Облыстық «Сарыарқа самалы» газеті,

 

Театрдың өзегі

  1 20160112 1074559849Әділет АХАНОВ, театрдың режиссері: - Мен еңбек жолымды осы өнер ордасынан бастағанымды сәттілік деп есептеймін. Өйткені Павлодар театрында қалыптасқан орта, әсіресе талантты артистер баршылық. Мұндай өнер ұжымымен кез келген классикалық драмаларды жүрексінбей сахналауға болады. Биыл алғаш рет өзбек драматургы Е.Құшуақтовтың «Қызыл алма» спектаклін қойдық. Белгілі жыршы Данияр Әсеновпен Абай ақынның шығармаларына арналған «Желсіз түнде жарық ай» моноспектаклін сахналадық. Айта кетейін, аталмыш қойылым биылғы желтоқсанның 5-інен бастап Ресейдің Омбы қаласындағы қазақ диаспорасының шақыруымен сол жаққа сапарға шықты. Олар Омбы қаласы мен сол аймақтағы қандастарымыз қоныстанған жерлерде өнер көрсетпек.

Қаңтар айында көрермендерімізге С.Жүнісовтің «Қылмыскер» атты пьесасын қоюды жоспарлап отырмыз. Бұл - өмірлік философияға негізделген, терең ойға жетелейтін тартымды қойылым.

Әрине, әрбір режиссер классикалық туындыны сахналауды армандайды. Отбасы, ошақ қасының әңгімесінен гөрі дара қаламгерлердің туындылары көрерменді көбірек тартатыны даусыз. Мен, мәселен, Ғ.Мүсіреповтің «Қозы Көрпеш-Баян сұлу» пьесасын жаңа қырынан қойсам деймін. Жүсіпбек Аймауытов туындыларының арасынан «Мансапқорлар» драмасы да сахнаға сұранып тұр. Музыкалық театр болғандықтан, бірнеше мюзиклдерді сахналау да ойда бар. Бұлар - алдағы күннің еншісіндегі дүниелер.

Шығармашылық талап бар жерде өнер жұтамайды.

Түйін:

Иә, қазақ театры алғаш ашылған сонау 1938 жылдан бері талай қиындықты бастан кешті, алақайлап ашылды, солақай саясаттың кесірінен жабылды, ширек ғасыр театрсыз қалып, тәуелсіздік қарсаңында қайта ашылды. Бұл күнде ағзам сарайындай тамаша ғимараты, талантты өнер иелері бар. Репертуары... репертуары М.Әуезов атындағы «әкемтеатрдан» кем емес. Әлемдік дәрежедегі жауһар дүниелердің бағы жанды. Талай әйгілі режиссерлер келіп, спектакльдер қойды. Мыңдаған көрерменнің алғысын алды. Қазір ақпарат заманы, кез келген кино, өнер туындысын отыңның басында отырып-ақ көре бересің. Бірақ бір нәрсе айқын: заманауи бұл жетістіктер театрды, қолөнерді, жалпы ұлттық өнерді өшіре алмайды. Ұлы мәртебелі театр ұлы күйінде қала бермек. Өйткені театрдың тамырында ғасырлар өшіре алмаған әдебиет, мәдениет, тарих - ұлттың руханияты бүлкілдеп жатыр. Ол сонысымен асқақ! Мерейтойың құтты болсын, өнер ордасы!

 

 

Премьера

Ерболат Айнабеков, «Оңтүстік Қазақстан»

Жуырда Павлодар облыстық Ж.Аймауытов атындағы қазақ музыка драма театры

драматург, жерлесіміз Сабырбек Олжабайдың «Қара көзілдірікті келіншек» 

атты пьесасын сахналағаны туралы хабарлағанбыз.

 

ШЫМЫЛДЫҚ

ШЕҢБЕРІНДЕГІ

ШЫНДЫҚ

 

Қойылым өмірдегі, қоғамдағы түрлі қайшылықтарға, әлеуметтік, психологиялық тартыстарға толы. Отбасылық бақытты тәрк етіп, дүние – жалғанның жетегінде кету, ұлттық құндылықтарды бағалай білмеу, соңында осы ойсыздықтың жазасын тарту – қай қоғамда да кездесіп жататын құбылыс. Ал, оны жеріне жеткізе жазу бар да, өмірдің боямасыз осы көрінісін қаз – қалпында көрермендер назарына сахна тілінде сөйлете білу бар. Бұл тұрғыда  режиссердің адамның жан дүниесі мен тағдырын терең зерттеп, соны ізденістеге баруы, актер мен көрермен арасындағы шынайы байланыс орнатуға талпынуы, сахнадағы жүріп жатқан қойылымның барынша сенімді шығуына күш салғаны аңғарылады. Спектакльде  жекелеген адамдардың өмірі арқылы қоғамдағы күрделі, түйіні тарқатылуы қиын түйткілдер тақырып арқауына айналды.